ولازم تامنوا بده
جربوا مرة تجوعوا جوعهم
جربوا فى مرة دموعهم
اللى مش نازلة علشان كريم
دى نازلة بس
لان البرد قارص
لان جوعهم كافر
ومالوش رسل منزله
تجعله يأمن
رسوله دايما يسافر
وربنا مجعلش حوت فى طريقه
يرجعه
لازم تأمنوا ان جوعهم كافر
وقصاد كل رصاص ضربوه
لحظة خلاص نفسهم فيها
من الجوع
والدموع اللى ملت
البطن والعيون
والشوارع اللى اتملت بالدم
الجدار اللى كان امبارح ابيض
واستحال لونه
للاحمرار
علشان حمار
ضحى بينا
وحط اللقمه
قدام الحق
فكان طبيعى
تكون اللقمه
هى الاهم
انابصفتى
شخص يائس
بقولكوا
اللقمه تكسب
والحق خسران
طول ما الرصاصه
فى ايد الجعان
والخلاص جواه
كامن فى انه يقتل حق
يقتل كل اللى قالوا لا
فى زمن الـ نعم
للعهر والكفر اللى زاد
انا بصفتى
بنصحكوا
لما الجدار يتملى بلونه الاحمر
ادهنوه
واعملوا منه للشهيد
حته جرافيتى
يمكن كدة حقه يرجع
ودمه اللى سال
يسيل قدامه دم
حته جرافيتى
هيتمسح بعد ما رسامه
يخلص
انا بصفتى بقولكوا
جوعوا مرة
حسوا مرة
واعرفوا ان اللقمة مرة
واعرفوا ان الحق مر
واعرفوا ان الجوع
امر
ليست هناك تعليقات:
إرسال تعليق